الشاعر الدكتور عبدالرحمن فتحي الحناوي
----------------
( راضيه بحالي )
زهقت َمن كتر الشيل
تعبت من هد الحيل
ولقمة العيش عايزاني
أسعى لها نهار وليل
قولولي إمتى ارتاح
وانا يومي كله كفاح
من بدري شايله همومي
ونسيت انا
طوافه عالأبواب
والخطوه فيها عذاب
لا عمري مديت إيدي
ولا زدت في الحساب
من كتر تعبي رحت
لأكتر من طبيب
وصفوا الدوا وشربت
والجرح بكره يطيب
الله يرحم أبويا
كان شايل همي عني
ولما احتجت اخويا
بِعِد بحياته عني
كل البنات من سني
في بيوتها مرتاحين
وانا الشقا كال مني
وصابره عليه سنين
الصبر كله شفته
ف عيون المجروحين
والمر كله دقته
الرحمه يا مسؤولين
نفسي في دكانه ولاَّ
كشك مِحَنْدق صغير
ساعدوني بسرعه يلٌَا
من غير بطء وتأخير
أدعو ربي المجيب
دعوات الواثقين
يرزقني بالنصيب
يرتاح بالي سنين
حامده ربي وشاكره
فضله عليا الكبير
راضيه بحالي و لابسه
الخيش بدل الحرير
----------------------
بقلم د / عبد الرحمن فتحي الحناوي .
من مصر .
الأحد ٢٥ من سبتمبر ( أيلول) سنة ٢٠٢٢ .
تعليقات
إرسال تعليق